پارلیمنٹ میں آج پی ٹی آئی چئیرمین کی باقیات رہ گئی ہیں،خواجہ آصف

اسلام آباد: وزیر دفاع خواجہ آصف کا کہنا ہے کہ پارلیمنٹ میں آج پی ٹی آئی چئیرمین کی باقیات رہ گئی ہیں، یہ سب اس شخص کا کوڑا کرکٹ ہے جو عدالتوں سے بھاگ رہا ہے۔

پارلیمنٹ کے مشترکہ اجلاس سے خطاب کرتے ہوئے خواجہ آصف نے کہا کہ ایوان میں پی ٹی آئی کا کوڑا کرکٹ باقی رہ گیا ہے، پہلے اپنا دامن دیکھیں پھر ہمیں پاک دامنی کا طعنہ دیں، یہاں ایک منٹ میں 54 قوانین منظور ہوئے۔

انہوں نے مزید کہا کہ آج چیئرمین پی ٹی آئی کے لوگ یہاں بات کر رہے ہیں جو آرمی چیف کو باپ کہتا تھا، اپنے ورکرز سامنے لاکر خود چوہوں کی طرح چھپ رہا ہے، جس شخص کا دفاع خواتین کریں گی اس کی بہادری کیا ہو گی۔