لاہور:وزیر اعلیٰ پنجاب مریم نواز شریف نے شکر گڑھ کے علاقے میں سیلابی ریلے میں پھنسے 25 افراد کو بحفاظت نکالنے والے ریسکیو عملے اور انتظامیہ کی بھرپور تعریف کی ہے۔ انہوں نے بروقت اور موثر ریسکیو آپریشن پر شکر گڑھ انتظامیہ اور ریسکیو ٹیم کو شاباش دی۔
مریم نواز شریف نے کہا کہ ہر جان قیمتی ہے اور 25 افراد کو بچانے والے قومی ہیرو ہیں جنہوں نے اپنی ذمہ داریوں کو بھرپور طریقے سے ادا کیا۔ انہوں نے واضح کیا کہ سیلاب قدرتی آفت ہے مگر حکومت عوام کے جان و مال کی حفاظت ہر صورت یقینی بنائے گی۔
وزیر اعلیٰ پنجاب نے عوام پر زور دیا کہ وہ دریاؤں، ندیاں اور نالوں کی گزرگاہ سے دور رہیں اور ہنگامی حالات میں محفوظ مقامات پر بروقت منتقل ہوں تاکہ جان و مال کا تحفظ ممکن ہو سکے۔
