لاہور: پنجاب پولیس کی جانب سے سیلاب زدہ علاقوں میں ریسکیو اینڈ ریلیف آپریشن بھر پور انداز سے جاری ہے۔ آئی جی پنجاب ڈاکٹر عثمان انور کے مطابق اب تک 7 لاکھ 28 ہزار 241 سیلاب متاثرین کو محفوظ مقامات پر منتقل کیا جا چکا ہے۔
ترجمان پنجاب پولیس کے مطابق ریسکیو کیے گئے متاثرین میں 2 لاکھ 90 ہزار سے زائد مرد، 2 لاکھ 35 ہزار 148 خواتین اور 2 لاکھ سے زائد بچے شامل ہیں۔ پولیس نے 6 لاکھ 29 ہزار 537 مویشیوں کو بھی سیلاب زدہ علاقوں سے نکال کر محفوظ مقامات پر منتقل کیا۔
آئی جی پنجاب نے بتایا کہ ریسکیو اینڈ ریلیف آپریشن میں 16 ہزار سے زائد افسران و اہلکار، 770 وہیکلز اور 40 کشتیاں حصہ لے رہی ہیں، جبکہ سیف سٹی کی تھرمل امیجنگ ٹیکنالوجی اور ڈرون کیمروں کا بھی استعمال کیا جا رہا ہے۔
انہوں نے کہا کہ آخری شہری کے محفوظ مقام پر پہنچنے تک ریسکیو اور ریلیف آپریشن جاری رکھا جائے گا۔ ترجمان پنجاب پولیس کے مطابق صرف ملتان ریجن سے 2 لاکھ 43 ہزار 719 اور ڈی جی خان ریجن سے ایک لاکھ 9 ہزار 832 شہریوں کو محفوظ مقامات پر منتقل کیا گیا۔
