ممبئی :بھارتی ماڈل و اداکارہ راکھی ساونت عمرہ کی سعادت حاصل کرکے واپس بھارت پہنچ گئیں
بھارتی ماڈل و اداکارہ راکھی ساونت( فاطمہ) نے عمرے کی سعادت حاصل کرنے کے بعد عمرہ ادائیگی کی تصاویر سوشل میڈیا پر شیئر بھی کی تھیں
تصاویر میں راکھی ساونت کوخانہ کعبہ کے سامنے کھڑا دیکھا جاسکتا ہے، راکھی ساونت کے فوٹو اینڈ ویڈیو شیئرنگ پلیٹ فارم انسٹاگرام اکاوٴنٹ پر خانہ کعبہ کے طواف کے دوران ایک ویڈیو شیئر کرتے ہوئے ان کی عمرہ ادائیگی کی اطلاع دی گئی
اب راکھی ساونت عمرہ کی سعادت حاصل کرکے واپس بھارت پہنچ گئیں۔جہاں انہیں صحافی کی جانب سے مذہب کی تبدیلی سے متعلق سوال کا سامنا کرنا پڑا۔
سوشل میڈیا پر راکھی ساونت کی عمرے سے واپسی کی ایک ویڈیو سامنے آئی ہے جس میں ان کے رفقا نے عمرے سے واپسی پر پھولوں کے ہار پہنائے جب کہ اس موقع پر راکھی نے صحافیوں سے بھی گفتگو کی۔
ائیرپورٹ پر راکھی سے ایک مقدمے سے متعلق سوال ہوا جس پر انہوں نے کہا کہ مجھے کچھ نہیں پتا، میں ابھی عمرہ کرکے آئی ہوں، میں بہت پاک زمین پر گئی تھی، کون کیا ڈرامہ کررہا ہے مجھے نہیں معلوم۔
ہندو مذہب کو چھوڑ کر اسلام کو قبول کرنے سے متعلق سوال پر اداکارہ نے کہا کہ ہندو مذہب میں کوئی برائی نہیں چونکہ میرا نکاح ہوا ہے اور میں ایک سال سے اسلام میں ہوں، میں بہت خوش نصیب ہوں مکہ مدینہ سے میرا بلاوا آیا تھا۔
یاد رہے کہ چند ماہ قبل راکھی نے عادل درانی کے ساتھ نکاح کی تصاویر اور ویڈیوز شیئر کرتے ہوئے اپنی شادی کا اعلان کیا تھا جب کہ ان کی مسلمان ہوکر کلمہ پڑھنے کی ویڈیو بھی سامنے آئی تھی۔
