پنجاب میں جامعات کے طلبہ کے لئے ہونہار اسکالر شپ کی رجسٹریشن جاری

لاہور: پنجاب حکومت نے 130 ارب روپے سے ہونہار اسکالر شپ پروگرام متعارف کرادیا۔

وزیراعلیٰ پنجاب مریم نواز شریف کی ہدایت پر ہونہار اسکالر شپ کی رجسٹریشن شروع کردی گئی ہے جس کے تحت 68 مضامین میں ہر سال 30 ہزار طلبا کو اسکالر شپ دی جائے گی، پنجاب بھر کی 50 پبلک سیکٹریونیورسٹیز کے طلبہ اسکالر شپ حاصل کرسکیں گے جس کیلئے جامعات میں انفارمیشن ڈیسک قائم کردیے گئے ہیں۔

انڈر گریجوایٹ ڈگری پروگرام کے تحت 4 سے 5 سال تک اسکالر شپ مہیا کی جائے گی۔ طلبہ کی اہلیت کا تعین کرنے کے لئے میٹرک کے 30 فیصد اور انٹر میڈیٹ کے 70 فیصد مارکس سے میرٹ بنے گا۔

ہونہار اسکالر شپ کے تحت طلبہ کی مکمل ٹیوشن فیس ادا کی جائے گی۔ 22 سال سے کم عمر 3 لاکھ سے کم آمدن رکھنے والے پنجاب کے شہری اسکالر شپ کے لئے اپلائی کر سکیں گے۔ ایم بی بی ایس اور بی ڈی ایس کے طلبہ بھی اسکالر شپ کے لئے اپلائی کر سکیں گے۔ honhaarscholarship.punjabhec.gov.pk پر 18 اکتوبر تک اسکالر شپ کے لئے اپلائی کیا جا سکے گا۔

وزیراعلیٰ مریم نواز کا کہنا ہے کہ پنجاب کاہر طالب علم میرا بیٹا اور ہر طالبہ میری بچی ہے۔ طلبہ کو ہائر ایجوکیشن کے لئے خالصتاً میرٹ کی بنیاد پر اسکالر شپ دئیے جائیں گے۔ ہونہار اسکالر شپ کا مقصد محدود وسائل کے ساتھ اچھے نمبرز حاصل کرنے والے طلبہ کو اعلیٰ تعلیم کے مواقع فراہم کرنا ہے۔