لاہور میں اسموگ کے تدارک کے لئے اسکولوں کے اوقات کار تبدیل، آتش بازی پر مکمل پابندی عائد

لاہور:سینئر صوبائی وزیر مریم اورنگزیب کی ہدایت پر محکمہ ماحولیات ایکشن میں آگیا، محکمہ ماحولیات نے اسموگ کے اثرات میں کمی کے لیے ایڈوائزری جاری کردی، ایڈوائزری میں اسکول کھلنے کا وقت صبح 8:45مقرر کیا گیا ہے.

ایڈوائزری کے تحت شہر میں ہر قسم کی آتش بازی پر مکمل پابندی لگا دی گئی ہے۔ان پابندیوں کا اطلاق 28 نومبر 2024 سے ہوگا اور 31 جنوری 2025 تک جاری رہے گا۔

ایڈیشنل ڈپٹی کمشنر فنانس اینڈ پلاننگ کے مطابق مسلسل دو دن سے فضائی آلودگی کا اشاریہ 150 سے تجاوز کر رہا ہے اور اگلے تین دنوں کے لیے بھی اسی طرح کی پیش گوئی کی گئی ہے، ہم نے خاص طور پر بچوں ، بوڑھوں اور بیمار افراد سمیت ہر شہری کی صحت کا تحفظ کرنا ہے، کیونکہ ہوا کی آلودگی کے اثرات ان طبقات کے لئے زیادہ خطرناک ثابت ہوتے ہیں۔

ایڈیشنل ڈپٹی کمشنر فنانس اینڈ پلاننگ کے مطابق لاہور ضلع میں آتش بازی کے استعمال پر پابندی 31 جنوری 2025 تک نافذالعمل رہے گی اور حکم کی خلاف ورزی کرنے والوں کے خلاف قانونی کارروائی کی جائے گی۔

ان کا کہنا تھا کہ آلودگی کے اثرات سے بچنے کے لیے شہریوں کا احتیاطی تدابیر پر عمل پیرا ہونا لازمی ہے، شہری ماسک پہنیں اور آلودگی کے اوقات میں بیرونی سرگرمیوں سے گریز کریں، شہری وافر مقدار میں پانی پینے سے مضر اثرات سے محفوظ رہ سکتے ہیں۔

ایڈیشنل ڈپٹی کمشنر فنانس اینڈ پلاننگ کے مطابق یہ اقدامات اسموگ کے مسئلے سے نمٹنے کی وسیع تر کوششوں کا حصہ ہیں۔