ابو ظہبی: پاکستان اور متحدہ عرب امارات کے درمیان دوطرفہ سیاسی مشاورت کے دوسرے دور کے دوران دونوں فریقین نے دوطرفہ تعلقات کے تمام پہلوؤں کا جائزہ لیا اور باہمی تعاون کو مختلف شعبوں میں مزید فروغ دینے کے عزم کا اعادہ کیا۔
ترجمان دفترخارجہ کے مطابق پاکستان اور متحدہ عرب امارات (یو اے ای) کے درمیان دوطرفہ سیاسی مشاورت (BPC) کا دوسرا دور آج ابو ظہبی میں منعقد ہوا۔پاکستانی وفد کی قیادت وزارتِ خارجہ کے ایڈیشنل سیکریٹری برائے مشرق وسطیٰ، شہریار اکبر خان نے کی جبکہ متحدہ عرب امارات کی جانب سے ڈپٹی اسسٹنٹ وزیر برائے سیاسی امور محترمہ ریم کتائت نے وفد کی سربراہی کی۔
مذاکرات کے دوران دونوں فریقین نے دوطرفہ تعلقات کے تمام پہلوؤں کا جائزہ لیا اور باہمی تعاون کو مختلف شعبوں میں مزید فروغ دینے کے عزم کا اعادہ کیا۔ فریقین نے علاقائی و عالمی امور پر تبادلہ خیال کیا اور کثیرالملکی فورمز پر تعاون اور مکالمے کو مزید مضبوط بنانے کے عزم کا اظہار کیا۔
ایڈیشنل سیکریٹری نے پاکستان اور یو اے ای کے مابین قریبی برادرانہ تعلقات کو مزید مستحکم کرنے کی اہمیت پر زور دیا، جو باہمی اقدار، احترام اور مشترکہ مفادات پر مبنی ہیں۔ دونوں جانب سے باہمی تعلقات میں مثبت پیش رفت کو سراہا گیا اور جوائنٹ منسٹریل کمیشن (JMC) سمیت ادارہ جاتی روابط کے تحت ہونے والی پیش رفت پر اطمینان کا اظہار کیا گیا۔
ترجمان دفترخارجہ کے مطابق مشاورت کے اختتام پر دونوں فریقین نے اعلیٰ سطحی روابط اور ادارہ جاتی روابط کے تسلسل کو برقرار رکھنے پر اتفاق کیا اور آئندہ دور کی مشاورت اسلام آباد میں باہمی رضامندی سے طے شدہ تاریخ پر منعقد کرنے کا فیصلہ کیا۔
