راولپنڈی :سیکیورٹی فورسز کی جانب سے بلوچستان کے ضلع کچھی کے عمومی علاقے کولپور میں خفیہ اطلاعات کی بنیاد پر ایک آپریشن کے دوران 2بھارتی حمایت یافتہ دہشتگردمارے گئے۔
آئی ایس پی آر کے مطابق 06 جون کو سیکیورٹی فورسز نے بلوچستان کے ضلع کچھی کے عمومی علاقے کولپور میں خفیہ اطلاعات کی بنیاد پر ایک آپریشن کیا۔ اطلاعات کے مطابق اس علاقے میں بھارت کے آلہ کار دہشت گرد گروہ فتنہ الہندستان کے دہشت گرد موجود تھے۔
آئی ایس پی آرکاکہناہے کہ آپریشن کے دوران سیکیورٹی فورسز نے مؤثر انداز میں دہشت گردوں کے ٹھکانے کو نشانہ بنایااس دوران شدید فائرنگ کے تبادلے کے بعد دو بھارتی حمایت یافتہ دہشت گردوں کو جہنم واصل کر دیا گیا۔مارے گئے دہشت گردوں سے اسلحہ اور گولہ بارود بھی برآمد ہوا ہے۔
آئی ایس پی آرکاکہناہے کہ یہ دہشت گرد علاقے میں بھارتی سرپرستی میں ہونے والی متعدد دہشت گردانہ کارروائیوں میں ملوث رہے ہیں جبکہ علاقے میں ممکنہ طور پر چھپے دیگر دہشت گردوں کی تلاش اور خاتمے کے لیے کلیئرنس آپریشن جاری ہے۔
آئی ایس پی آرکاکہناہے کہ پاکستانی سیکیورٹی فورسز ملک سے بھارتی سرپرستی میں جاری دہشت گردی کے ناسور کے مکمل خاتمے کے لیے پرعزم ہیں اورقوم کے اس غیر متزلزل عزم کا اعادہ کرتی ہیں کہ دہشت گردی کے مجرموں کو انصاف کے کٹہرے میں لایا جائے گا۔
