اسلام آباد: سپیکر قومی اسمبلی سردار ایاز صادق نے چیئرمین پیپلز پارٹی بلاول بھٹو زرداری سے ٹیلی فونک رابطہ کیا ہے۔
ٹیلیفونک رابطے کے دوران سپیکر نے بلاول بھٹو سے آصف علی زرداری کی صحت بارے دریافت کیا، سردار ایاز صادق نے صدر مملکت آصف علی زرداری کی جلد مکمل صحت یابی کیلئے دعا بھی کی۔
بلاول بھٹو نے صدر مملکت اور اپنے والد کیلئے نیک خواہشات پر سپیکر قومی اسمبلی کا شکریہ ادا کیا۔
یاد رہے کہ صدر پاکستان آصف علی زرداری کا گزشتہ رات دبئی ایئر پورٹ پہنچنے پر جہاز سے اترتے ہوئے پاوٴں فریکچر ہوگیا تھا جہاں انہیں فوری طور پرابتدائی طبی امداد کے لئے ہسپتال منتقل کیا گیا، ڈاکٹرز نے چیک اَپ کے بعد صدر زرداری کے پاوٴں پر پلاستر کر کے گھر منتقل کر دیا۔
ترجمان ایوانِ صدر کے مطابق ڈاکٹروں کی جانب سے صدر مملکت آصف زرداری کو مکمل آرام کا مشورہ دیا گیا ہے۔
