طرابلس: لیبیا میں بحیرہ روم سے آنے والے سمندری طوفان کے نتیجے میں کم از کم 3 ہزار افراد جاں بحق اور ہزاروں لاپتہ ہوگئے ہیں۔
لیبیا کے وزیر صحت عثمان عبدالجلیل کے مطابق ملک کے شمال مشرقی ساحلی علاقوں سے ٹکرانے والے سمندری طوفان سے پیدا ہونے والی سیلابی صورت حال سے ہلاکتوں کی تعداد 3 ہزار ہوگئی ہے جبکہ ہزاروں دیگر افراد سیلابی ریلوں میں بہہ کر سمندر میں لاپتہ ہوگئے ہیں۔
عثمان عبدالجلیل نے خدشہ ظاہر کیا ہے کہ لاپتہ افراد سمندری پانی میں ڈوب گئے ہیں۔
لیبیا میں سمندری طوفان کی تباہ کاریوں کے باعث حکومت نے بین الاقوامی اور مقامی ایجنسیوں سے امداد کی اپیل کردی ہے۔
سمندری طوفان کے باعث لیبیا کے شمال مشرقی ساحلی علاقوں میں کرفیو نافذ کردیا گیا ہے اور ساتھ ہی تعلیمی اداروں میں سرگرمیاں غیر معینہ مدت کیلئے معطل کردی گئی ہیں۔
