اسلام آباد: نائب وزیرِ اعظم و وزیرِ خارجہ، سینیٹر محمد اسحاق کی زیرِ صدارت پاکستان کے توانائی کے شعبے کو درپیش چیلنجز کے جائزے کے لیے ایک اہم اجلاس منعقد ہوا۔
اجلاس میں وفاقی وزیر برائے توانائی، معاونِ خصوصی برائے مالی امور طارق باجوہ، قومی کوآرڈینیٹر برائے توانائی اصلاحات، نیشنل کوآرڈینیٹر SIFC، سیکریٹری خزانہ، سیکریٹری توانائی سمیت دیگر سینئر حکومتی افسران نے شرکت کی۔
اجلاس میں توانائی کے شعبے کی مالی پائیداری اور طویل المدتی استحکام کو لاحق مسائل پر تفصیلی گفتگو ہوئی۔ گفتگو میں توانائی کے استعمال کے رجحانات، نرخوں کے تعین کے طریقۂ کار، سبسڈی کے نظم و نسق، اور ترسیلی و تقسیم (T&D) کے نقصانات میں کمی جیسے اہم موضوعات شامل تھے۔
نائب وزیرِ اعظم نے متعلقہ وزارتوں کو ہدایت کی کہ وہ ان مسائل کے حل کے لیے ٹھوس اور قابلِ عمل تجاویز پیش کریں تاکہ توانائی کے شعبے کو طویل المدتی بنیادوں پر مستحکم بنایا جا سکے۔
