اسلام آباد: محکمہ موسمیات نے عید الاضحیٰ کی تعطیلات اور آئندہ ہفتے کے دوران ملک کے بیشتر حصوں میں شدید گرمی کی لہر کی پیشگوئی کی ہے، جس کے پیش نظر شہریوں کو احتیاطی تدابیر اختیار کرنے کی سختی سے ہدایت کی گئی ہے۔
محکمہ موسمیات کے مطابق 07 سے 12 جون 2025 کے دوران ملک کے بالائی علاقوں بشمول وسطی/بالائی پنجاب، اسلام آباد، خیبرپختونخوا، کشمیر اور گلگت بلتستان میں دن کا درجہ حرارت معمول سے 05 سے 07 ڈگری سینٹی گریڈ زیادہ رہنے کا امکان ہے۔
اسی طرح، جنوبی علاقوں جیسے بالائی/وسطی سندھ، جنوبی پنجاب اور بلوچستان کے علاقوں میں درجہ حرارت معمول سے 04 سے 06 ڈگری سینٹی گریڈ زیادہ رہنے کی توقع ہے۔
اس شدید گرمی کی لہر کے ممکنہ اثرات سے بچنے کے لیے عوام الناس، بالخصوص بچوں، خواتین اور بزرگ شہریوں کو خصوصی احتیاطی تدابیر اختیار کرنے کا مشورہ دیا گیا ہے۔ شہریوں کو دن کے اوقات میں غیر ضروری طور پر دھوپ میں نکلنے سے گریز کرنے اور پانی کا زیادہ سے زیادہ استعمال کرنے کی تاکید کی گئی ہے۔
گزشتہ 24 گھنٹے کے دوران ملک کے بیشتر علاقوں میں موسم گرم اور خشک رہا،سب سے زیادہ درجہ حرارت سبی میں 47ڈگری سینٹی گریڈ ریکارڈ کیا گیا۔
