ضلع کرم میں امدادی سامان لے جانے والے قافلے پر دہشت گردوں کے حملے میں شہید اہلکاروں کی تعداد 2 ہوگئی

کرم: ضلع کرم کے علاقے بگن میں گزشتہ روز امدادی سامان لے جانے والے قافلے پر دہشت گردوں کے حملے میں شہید اہلکاروں کی تعداد 2 ہوگئی۔
پولیس کے مطابق دہشتگردوں کے حملے میں 3 ڈرائیورز بھی جاں بحق جبکہ 5 اہلکار زخمی ہوئے۔
تاجر رہنماوٴں کا کہنا ہے کہ حملے میں پانچ ڈرائیور تاحال لاپتہ ہیں، گزشتہ روز حملے کے بعد 10 سے زائد ٹرکوں کو لوٹنے کے بعد جلا دیا گیا۔
خیال رہے کہ گزشتہ روز کرم جانے والے قافلے پر دہشت گردوں کے حملے میں ایک اہلکار شہید ہوا تھا جبکہ سکیورٹی فورسز کی جوابی کارروائی میں 6 حملہ آور ہلاک ہوگئے تھے۔
یاد رہے کہ گزشتہ روز ٹل سے 35 ٹرکوں کا قافلہ اپر کرم کیلئے روانہ ہوا تھا، دہشت گردی کے واقعے کے بعد کرم جانے والے مال بردار قافلے کو روک کر واپس روانہ کر دیا گیا تھا۔
ضلعی انتظامیہ کا کہنا ہے کہ کرم میں قیام امن کے لئے اقدامات جاری ہیں۔