اسلام آباد: صدرِ مملکت آصف علی زرداری نے شہید محترمہ بینظیر بھٹو کی 72 ویں سالگرہ کے موقع پر اپنے پیغام میں کہا ہے کہ ہم شہید محترمہ بینظیر بھٹو کی قومی خدمات اور عظیم قربانیوں کو خراجِ عقیدت پیش کرتے ہیں۔ انہوں نے کہا کہ شہید محترمہ بینظیر بھٹو نے جمہوریت، انسانی وقار اور خواتین کے حقوق کے لیے ناقابل فراموش جدوجہد کی۔
صدر زرداری نے کہا کہ شہید بی بی نے نہ صرف آمریت کے خلاف بے مثال جرأت اور استقامت سے مزاحمت کی بلکہ ملک میں جمہوریت کی بحالی کی تحریکوں کی بھی قیادت کی۔ انہوں نے واضح کیا کہ شہید بی بی قانون کی حکمرانی اور آئین کی بالادستی پر مکمل یقین رکھتی تھیں۔
صدر مملکت نے شہید بینظیر بھٹو کی وراثت کو پیپلز پارٹی کا اجتماعی اثاثہ قرار دیتے ہوئے کہا کہ شہید بی بی کی قربانیاں، وژن اور عوام سے وابستگی پیپلز پارٹی کی اجتماعی میراث ہے۔ انہوں نے کہا کہ ہم شہید محترمہ بینظیر بھٹو کے وژن سے رہنمائی لیتے ہوئے جمہوریت کو مستحکم کریں گے، وہ ایک پرامن، خوشحال پاکستان کی خواہاں تھیں۔
صدر زرداری نے زور دے کر کہا کہ شہید محترمہ بینظیر بھٹو کی فکر آج بھی ایک منصفانہ اور جمہوری معاشرے کے قیام کے لیے مشعلِ راہ ہے۔
