اسلام آباد:لیڈر آف ہاؤس سینیٹر اسحاق ڈار نے سینیٹ سے 27ویں آئینی ترمیم کی متفقہ منظوری کو خوش آئند قراردیتے ہوئے کہا کہ ترمیمی بل پر اپوزیشن سمیت تمام ارکان کو کھل کر رائے دینے کا موقع دیا گیا۔
27 آئینی ترمیم کی منظوری کے بعد ایوان میں اظہار خیال کرتے ہوئے سینیٹر اسحاق ڈار نے کہا کہ وزیراعظم نے بل پر تمام اتحادی جماعتوں سے الگ الگ ملاقاتیں کر کے مشاورتی عمل مکمل کیا ہمیں اسی طرح افہام و تفہیم سے آگے بڑھنا ہے۔
چیئرمین سینٹ سید یوسف رضا گیلانی نے کہا کہ انہوں نے بطور کسٹوڈین آف ہاؤس غیر جانبدار رہتے ہوئے اپنا ووٹ کاسٹ نہیں کیا پوری کوشش تھی کہ اپوزیشن کو ساتھ لے کر چلوں۔
اپوزیشن کے سینیٹر سیف اللہ ابڑو نے آئینی ترمیم کے حق میں ووٹ ڈالنے کے بعد اپنے فیصلے کا دفاع کرتے ہوئے کہا کہ حالیہ پاکستان بھارت جنگ میں ہماری مسلح افواج نے ہمارا سر فخر سے بلند کیا اور انھوں نے یہ ووٹ اپنی افواج کو خراج تحسین کے طور پر دیا۔
بعدازاں سینٹ اجلاس 13 نومبر شام چار بجے تک ملتوی کر دیا۔
