اسلام آباد:وزیراعظم محمد شہباز شریف نے انڈر 19ایشیا کپ کی فاتح قومی کرکٹ ٹیم کے لئےتمام کھلاڑیوں کےلئے ایک ایک کروڑ روپے اور ٹیم مینجمنٹ کے لئے پچیس لاکھ روپے فی کس کا اعلان کیاہے۔
انڈر 19ایشیا کپ کے فائنل میں بھارت کو شکست دے کر ٹائٹل جیتنے والی قومی کرکٹ ٹیم کے اعزاز میں وزیراعظم ہاؤس میں ظہرانے کا اہتمام کیا گیا۔ وزیراعظم محمد شہباز شریف نے نوجوان کھلاڑیوں اور ٹیم انتظامیہ سے ملاقات کی اور ان کی بہترین کارکردگی کو سراہا۔
وزیراعظم نے تمام کھلاڑیوں خاص طور پر سمیر منہاس، علی رضا اور عبدالسبحان کو شاندار پرفارمنس پر شاباش دی۔ انہوں نے کہاکہ مئی میں پاکستان نے معرکہ حق میں دشمن کو شکست سے دوچار کیا۔ قومی انڈر 19 ٹیم نے اسی جذبے کے تحت فائنل میں فتح حاصل کر کے قوم کا سر فخر سے بلند کردیا۔
وزیراعظم نے فاتح ٹیم اور انتظامیہ کے لئے انعامات کا اعلان کرتے ہوئے کہا کہ اس کامیابی نے اہل وطن کے وقار میں مزید اضافہ کیا ہے۔
چیئرمین پاکستان کرکٹ بورڈمحسن نقوی نے کہاکہ انڈر19 ایشیاکپ کا ٹائٹل جیتنا اہم اعزاز ہے۔ ٹیم نے شاندار سپورٹس مین شپ کا مظاہرہ کیا۔
قومی انڈر 19 ٹیم کے کپتان اور کھلاڑیوں نے حوصلہ افزائی پر وزیراعظم کا شکریہ ادا کرتے ہوئے استعدادکار میں اضافے کے لیے پی سی بی کے اقدامات کو سراہا۔
قومی انڈر 19ٹیم نے ایشیا کپ کے فائنل میں بھارت کو191رنز سے شکست دے کر دوسری مرتبہ ٹائٹل اپنے نام کیا۔پاکستان کے 347رنز کے جواب میں بھارتی ٹیم 26.2اوورزمیں صرف 156رنزہی بناسکی تھی۔
