امریکہ اور چین کے درمیان تجارتی معاہدہ طے پا گیا، نایاب دھاتوں اور تعلیمی تبادلے پر اتفاق

واشنگٹن: امریکہ اور چین کے درمیان ایک اہم تجارتی معاہدہ طے پا گیا ہے جس کا اعلان امریکی صدر ڈونلڈ ٹرمپ نے لندن میں دونوں ممالک کے اعلیٰ حکام کے درمیان بات چیت کے بعد کیا۔ اس معاہدے کے تحت امریکہ کو مطلوبہ نایاب دھاتیں فراہم کی جائیں گی جبکہ چینی طلباء امریکی کالجز میں اپنی تعلیم جاری رکھ سکیں گے۔

صدر ٹرمپ نے سوشل میڈیا پر جاری اپنے بیان میں کہا کہ مقناطیس اور دیگر ضروری نایاب دھاتیں چین کی طرف سے فراہم کی جائیں گی، اور اسی طرح امریکہ چین کو وہ اشیاء فراہم کرے گا جن پر معاہدے میں اتفاق کیا گیا ہے۔
انہوں نے مزید کہا کہ اس وقت امریکہ کو کل 55 فیصد ٹیرف حاصل ہو رہا ہے جبکہ چین کو 10 فیصد مل رہا ہے۔

یہ معاہدہ دونوں عالمی طاقتوں کے درمیان جاری تجارتی تنازعات کو حل کرنے کی جانب ایک اہم قدم سمجھا جا رہا ہے، اور توقع ہے کہ اس سے عالمی معیشت پر مثبت اثرات مرتب ہوں گے۔ اس معاہدے پر صدر شی جن پنگ اور صدر ٹرمپ کی حتمی منظوری کے بعد عمل درآمد شروع ہو جائے گا۔