امریکا کا پاکستان سمیت 41 ممالک کے شہریوں پر نئی سفری پابندیاں عائد کرنے پر غور

واشنگٹن: ٹرمپ انتظامیہ نے مختلف ممالک کے شہریوں پر نئی سفری پابندیاں عائد کرنے پر غور شروع کردیا۔
امریکی میڈیا کے مطابق سفری پابندیوں کا شکار ہونے والے ممکنہ 41 ممالک کی فہرست سامنے آگئی، سفری پابندیوں کا شکار ہونے والے ممکنہ 41 ممالک کو تین گروپس میں تقسیم کیا گیا ہے۔
میڈیا رپورٹس کے مطابق پہلے گروپ میں افغانستان، ایران، شام، کیوبا اور شمالی کوریا سمیت متعدد ممالک شامل ہیں پہلے گروپ میں شامل ممالک پر مکمل سفری پابندیاں عائد کی جائیں گی۔
دوسرے گروپ میں اریٹریا، ہیٹی، لاوٴس، میانمار اور جنوبی سوڈان شامل ہیں، دوسرے گروپ میں شامل ممالک کیسیاحتی اور سٹوڈنٹس ویزا معطل ہوں گے تاہم اس لسٹ میں شامل ممالک کے کاروباری مسافروں کو کچھ شرائط کے ساتھ امریکا میں داخلے کی اجازت دی جا سکتی ہے۔
امریکی میڈیا رپورٹ میں مزید بتایا گیا ہے کہ تیسرے گروپ میں بیلاروس، پاکستان اور ترکمانستان سمیت 26 ممالک شامل ہیں،اس لسٹ میں شامل ممالک کو تنبیہ کی جائے گی کہ 60 دنوں میں نظام میں بہتری نہ لائے تو جزوی ویزا معطلی کا شکار ہوں گے۔