پاکستان میں عورتوں کو اب بھی مشکلات کا سامنا ہے ہر عورت کو اس کا حق ملنا چاہیے،آصفہ بھٹو

اسلام آباد:پاکستان کی خاتون اول محترمہ آصفہ بھٹو زرداری نے کہا ہے کہ پاکستان میں عورتوں کو اب بھی مشکلات کا سامنا ہے ہر عورت کو اس کا حق ملنا چاہیے۔

پاکستانی عورتوں کے قومی دن کے موقع پر تقریب سے خطاب کرتے ہوئے خاتون اول آصفہ بھٹو زرداری نے کہا کہ محترمہ بینظیر بھٹو نے ہر شعبے میں عورتوں کی شمولیت کے لیے کام کیا ۔عورتوں کو پاکستان میں بہت سے مسائل کا سامنا ہے ۔

خاتون اول نے کہا کہ عورتوں کے حقوق کے لیے لیے عورت فاؤنڈیشن کے چالیس برس کی مسلسل کوششوں کو سراہتے ہیں ۔انہوں نے کہا کہ پاکستان میں عورتوں کے حقوق کی ہر بات محترمہ بینظیر بھٹو شہید کی یاد دلاتی ہے۔

تقریب سے خطاب کرتے ہوئے عورت فاؤنڈیشن کی سربراہ انیس ہارون نے کہا کہ عورتوں کے متعلق معاشرے کی سوچ بدلنے کی ضرورت ہے اور اچھے قوانین پر عمل کرنے کی ضرورت ہے ۔
تقریب میں خاتون اول نے سابق وزیر شہناز وزیر علی، جسٹس ریٹائرڈ ماجدہ رضوی ، سابقہ وفاقی وزیر شازیہ عطا مری اور دیگر خواتین کو بہترین خدمات پر ایوارڈز سے نوازا ۔