اسحاق ڈار نے صدر مملکت سے مستعفی ہونے کا مطالبہ کر دیا

اسلام آباد: مسلم لیگ (ن) کے رہنما سابق وزیر خزانہ اسحاق ڈار نے صدر مملکت سے ان کے حالیہ ٹوئیٹ پر مستعفی ہونے کا مطالبہ کرتے ہوئے کہا ہے کہ اس طرح کے بیانات مذاق اڑانے کے مترادف ہیں۔

سماجی رابطے کی ویب سائٹ ٹوئٹر پر اپنے پیغام میں اسحاق ڈار نے کہا کہ یہ بات ناقابل یقین ہے، اخلاقیات کا تقاضا ہے کہ صدر مستعفی ہوں، صدر مؤثر انداز میں دفتری کام کرنے میں ناکام رہے ہیں اللہ ہماری مدد کرے۔

انہوں نے کہا کہ سرکاری امور فائلز کے ذریعہ پایہ تکمیل کو پہنچتے ہیں، عملدرآمد یقینی بنایا جاتا ہے، اس طرح کے بیانات مذاق اڑانے کے مترادف ہیں۔

واضح رہے کہ صدر مملکت عارف علوی نے اپنے ٹوئٹ میں کہا ہے کہ میں اللہ کو گواہ بنا کر کہتا ہوں کہ میں نے آفیشل سیکریٹ ترمیمی بل 2023ء اور پاکستان آرمی ترمیمی بل 2023ء پر دستخط نہیں کیے کیونکہ میں ان قوانین سے متفق نہیں تھا۔