اسلام آباد:نگران وزیر خزانہ ڈاکٹر شمشاد اختر نے کہا ہے کہ آئی ایم ایف پروگرام پر مکمل عملدرآمد کیا جائے گا رواں مالی سال شرح نمو 2.5 فیصد رہے گی فاریکس مارکیٹ کو اصلاحات سے بہتر بنایا گیا مضبوط معیشت کیلئے ڈھانچہ جاتی اصلاحات کرنا ہوں گی قرض کا بوجھ کم کرنے کیلئے کام کیا جا رہا ہے۔
اسلام آباد میں پائیدار ترقی کی سالانہ کانفرنس سے خطاب کرتے ہوئے نگران وزیر خزانہ شمشاد اختر نے کہا کہ نگران حکومت نے مشکلات کے باوجود آئی ایم ایف کے ساتھ بروقت اسٹاف لیول معاہدہ کیا ملک پر قرضوں کا بوجھ بہت بڑھ گیا ہے ٹیکس آمدنی کا تین چوتھائی حصہ قرض کے سود کی ادائیگی پر لگ جاتا ہے ۔
انہوں نے کہا کہ حکومتی کمپنیوں کے نقصانات پانچ سو ارب روپے سے تجاوز کر گئے ہیں قرض کا بوجھ کم کرنے کیلئے اقدامات کیے جا رہے ہیں چین کے ساتھ 2.4 ارب ڈالر کا قرض موخر کروایا گیا ہے ملک کے معاشی مسائل خود کفالت سے حل کیے جائیں گے۔
ان کا کہنا تھا کہ برآمدات کو بڑھایا جائے گا منافع بخش حکومتی کمپنیوں کو سٹاک مارکیٹ پر لسٹ کروایا جائے گا اور انکی انتظامیہ نجی شعبے کے حوالے کی جائے گی۔
