لاہور: لاہور ہائیکورٹ میں سابق چیئرمین پی ٹی آئی کی نااہلی کے معاملہ پر رجسٹرار آفس نے درخواست کی سکروٹنی کا عمل مکمل کر لیا۔
لاہور ہائیکورٹ میں سابق چیئرمین پی ٹی آئی کی پانچ سال کے لئے نااہلی کیخلاف درخواست سماعت کے لئے مقرر ہوگئی، جسٹس شجاعت علی خان جمعہ کو سابق چیئرمین پی ٹی آئی کی نااہلی کے خلاف درخواست پر سماعت کریں گے، سابق چیئرمین پی ٹی آئی نے بیرسٹر گوہر اورعلی ظفر کی وساطت سے لاہور ہائیکورٹ میں درخواست دائر کی۔
درخواست میں الیکشن کمیشن کو فریق بنایا گیا ہے، درخواست میں مؤقف اختیار کیا گیا الیکشن کمیشن نے 8 اگست 2023ء کو بانی پی ٹی آئی کو پانچ سال کے لئے بطور رکن اسمبلی نااہل کیا، الیکشن کمیشن نے درخواست گزار کو الیکشن سے باہر کرنے کے لئے جلد بازی میں غیر قانونی اقدام کیا۔
درخواست گزار نے کہا سپریم کورٹ کے احکامات پر الیکشن کی تاریخ کا اعلان ہوچکا ہے، درخواست گزار الیکشن میں حصہ لینا چاہتا ہے، لگائے گئے الزامات بے بنیاد ہیں، عدالت الیکشن کمیشن کے جانب سے پانچ برس کی نااہلی کو کالعدم قرار دے۔
درخواست میں استدعا کی گئی کہ درخواست کے حتمی فیصلے تک نااہلی کا نوٹیفکیشن معطل کیا جائے۔
