راولپنڈی : توہین الیکشن کمیشن کیس میں بانی پی ٹی آئی اور سابق وزیر فواد چوہدری پر فرد جرم عائد نہ ہوسکی۔کیس کی سماعت بغیر کارروائی 3جنوری تک ملتوی کردی گئی۔
نثار درانی کی سربراہی میں چار رکنی کمیشن نے اڈیالہ جیل میں بانی پی ٹی آئی اورفوادچوہدری کے خلاف توہین الیکشن کمیشن کیس کی سماعت کی، فوادچوہدری کے وکیل فیصل فرید چوہدری عدالت پیش ہوئے۔
بانی پی ٹی آئی کے وکیل شعیب شاہین کاغذات نامزدگی کی سکروٹنی کے باعث پیش نہ ہوسکے۔
الیکشن کمیشن توہین کیس کی سماعت بغیر کارروائی 3جنوری تک ملتوی کردی گئی۔
الیکشن کمیشن کی کاز لسٹ جاری کیے جانے کے بعد فوادچوہدری کی جانب سے توہین الیکشن کمیشن کیس میں اوپن ٹرائل کی استدعا کی گئی ہے۔
بعدازاں فواد چوہدری کے وکیل فیصل چودھری نے اڈیالہ جیل کے باہر میڈیا سے گفتگو میں کہا کہ کیس کا ریکارڈ اور آرڈر شیٹ منگوایا گیا، فوادچوہدری اور میرے بھائی،تائید اور تجویز کنندہ کو ڈرایا اور دھمکایا جا رہا ہے، اوپن ٹرائل پر خصوصی طور پر بات کی گئی، کمیشن نے مجھے الیکشن کمیشن بلایا ہے، الیکشن کمیشن جا کر اپنی معروضات وہاں انکے سامنے پیش کروں گا۔
گزشتہ سماعت پر بانی پی ٹی آئی اور فواد چوہدری پر فردجرم عائد کرنے کی کارروائی ایک بار پھر موٴخر ہوگئی تھی۔
