راولپنڈی: سائفر کیس کی سماعت بغیر کسی کارروائی کے کل تک کے لیے ملتوی ہو گئی۔
جج ابوالحسنات محمد ذوالقرنین کے روبرو سائفر کیس کی سماعت ہوئی، جس میں ایف آئی اے کی ٹیم چاروں گواہوں سمیت اڈیالہ جیل پہنچی جب کہ تمام وکلائے صفائی بھی اس موقع پر عدالت میں موجود تھے۔
سماعت کے موقع پر بانی چیئرمین پی ٹی آئی اور شاہ محمود قریشی بھی کمرہ عدالت میں موجود تھے جب کہ عمران خان اہلیہ بشریٰ بی بی، بہنیں علیمہ خان، عظمیٰ خانم اور نورین خانم بھی اڈیالہ جیل پہنچیں۔ ان کے علاوہ شاہ محمود قریشی کی اہلیہ اور بیٹی بھی اڈیالہ جیل میں موجود تھیں۔
بعد ازاں خصوصی عدالت کے جج ابوالحسنات محمد ذوالقرنین نے سائفر کیس کی سماعت کسی کارروائی کے بغیر کل تک کے لیے ملتوی کردی۔ کل ہفتے کے روز گواہوں پر جرح ہوگی۔ سماعت ملتوی ہونے کے بعد جج ، ایف آئی اے کی ٹیم اور پراسیکیوٹر واپس روانہ ہو گئے۔
