راولپنڈی: سیکیورٹی فورسز نے ضلع خیبر میں دہشت گردوں کی موجودگی پر آپریشن کیا جس کے دوران شدید فائرنگ کے تبادلے میں 3 مبینہ دہشت گرد ہلاک ہوگئے۔
آئی ایس پی آر کے مطابق ضلع خیبر میں دہشت گردوں کی موجودگی کی اطلاع پر انٹیلی جنس پر مبنی کارروائی 24 اور 25 اپریل کی درمیانی شب کی گئی۔
آئی ایس پی آرکاکہناہے کہ سیکیورٹی فورسز کے پہنچنے پر دہشت گردوں نے اہلکاروں پر فائرنگ کی جس کے بعد دونوں اطراف سے شدید فائرنگ کا تبادلہ ہوا۔ جس میں تین مبینہ دہشت گرد مارے گئے جن میں شناخت سہیل (سرغنہ)، عظمتو اور حاجی گل عرف زرکاوی کے ناموں سے ہوئی۔
آئی ایس پی آر کے مطابق آپریشن کے دوران دہشت گردوں کے ٹھکانے کو بھی تباہ کر دیا گیا ہے جبکہ مارے گئے دہشت گردوں سے اسلحہ اور گولہ بارود بھی برآمد ہوا۔
آئی ایس پی آرکا کہنا ہے کہ مارے گئے دہشت گرد علاقے میں متعدد کارروائیوں میں سرگرم رہے تھے۔
آئی ایس پی آر کا کہنا ہے کہ اہل علاقہ نے سیکیورٹی فورسز کی کارروائی کو سراہتے ہوئے اپنے مکمل تعاون کی یقین دہانی کرائی ہے۔
آئی ایس پی آر کا کہنا ہے کہ دہشت گردوں کے قلع قمع کیلیے علاقے میں آپریشن جاری ہے اور سیکیورٹی فورسز جڑ سے دہشت گردی کی لعنت کو ختم کرنے کے لیے پُرعزم ہیں۔