کراچی : کراچی میں کریم آباد کے قریب دہشتگردوں کی فائرنگ میں محکمہ انسداد دہشت گردی (سی ٹی ڈی) کے ڈی ایس پی علی رضا جاں بحق ہوگئے۔وزیر داخلہ سندھ ضیا الحسن لنجار نے واقعے کا نوٹس لیتے ہوئے رپورٹ طلب کرلی۔
پولیس کے مطابق ڈی ایس پی علی رضا پردو حملہ آوروں نے فائرنگ کی، ڈی ایس پی علی رضا کو عباسی شہید ہسپتال منتقل کیا گیا جہاں وہ دوران علاج دم توڑ ہوگئے۔
ریسکیو ذرائع نے بتایا کہ ڈی ایس پی علی رضا کے سرمیں گولی لگی۔ فائرنگ سے علی رضا کا گن مین بھی زخمی ہوا، واقعے کی جگہ سے نائن ایم ایم کی گولیوں کے 11 خول ملے ہیں۔
علی رضا ڈی ایس پی سی ٹی ڈی انویسٹی گیشن تعینات تھے، وہ شہید ایس ایس پی چوہدری اسلم کے قریبی ساتھی تھے۔
ادھر وزیر داخلہ سندھ ضیا الحسن لنجار نے واقعے کا نوٹس لے لیا اور ڈی آئی جی سی ٹی ڈی اور ایس ایس پی سینٹرل سے رپورٹ طلب کرلی، انہوں نے ہدایت کی کہ حملے میں ملوث عناصر کی گرفتاری کیلئے فوری اقدامات کیے جائیں۔
