راولپنڈی: 27ویں یومِ تکبیر کے موقع پر مسلح افواجِ ، چیئرمین جوائنٹ چیفس آف سٹاف کمیٹی اور سروسز چیفس نے پوری قوم کو دل کی گہرائیوں سے مبارکباد پیش کی ہے۔
آئی ایس پی آر کی جانب سے جاری بیان میں کہا گیا ہے کہ یومِ تکبیر 28 مئی 1998 کا وہ تاریخی دن ہے جب پاکستان ایک ایٹمی طاقت بن کر اُبھرا اور جنوبی ایشیا میں سٹریٹجک توازن بحال ہوا۔ یہ دن قوم کے اتحاد، قربانی اور پُرامن خودمختاری کے عزم کا مظہر ہے۔
بیان میں کہا گیا کہ پاکستان کی سٹریٹجک صلاحیت قوم کا اجتماعی اعتماد ہے جو ملک کے باشعور عوام، سائنسدانوں، انجینئرز اور قیادت کی انتھک کاوشوں کا نتیجہ ہے۔مسلح افواج نے واضح کیا کہ پاکستان کی جوہری حکمتِ عملی قابل اعتماد کم سے کم دفاعی صلاحیت کے اصول پر مبنی ہے، جو علاقائی امن و استحکام کو برقرار رکھنے کے لیے ہے۔
افواج پاکستان نے مادرِ وطن کے دفاع کے لیے ہر خطرے کے خلاف مکمل تیاری کے عزم کا اعادہ کرتے ہوئے کہا کہ پاکستان کا جوہری پروگرام صرف دفاعی مقاصد کے لیے ہے اور یہ امن کا ضامن ہے۔
آئی ایس پی آر کی جانب سے جاری بیان کے اختتام پر کہا گیا کہ”یومِ تکبیر” ہمیں اپنی قومی یکجہتی، اور عزمِ مصمم کی تجدید کا موقع فراہم کرتا ہے۔ مسلح افواجِ پاکستان قوم کے ساتھ شانہ بشانہ کھڑی ہیں اور ان قربانیوں کو سلام پیش کرتی ہیں جنہوں نے اس سنگِ میل کو ممکن بنایا اور پاکستان کو استحکام، طاقت اور خود انحصاری کی راہ پر گامزن رکھا۔”
