میاں چنوں: قومی ہیرو اور اولمپین ارشد ندیم ایشین گیمز میں گولڈ میڈل جیتنے کے بعد اپنے آبائی شہر میاں چنوں پہنچ گئے، جہاں عوام نے اُن کا پرتپاک استقبال کیا۔ شہر پہنچنے پر ارشد ندیم پر پھولوں کی پتیاں نچھاور کی گئیں اور ان کے حق میں خیر مقدمی نعرے لگائے گئے۔
اس موقع پر صحافیوں سے گفتگو کرتے ہوئے ارشد ندیم نے کہا کہ انہوں نے جیولین تھرو میں ایشین گولڈ میڈل جیت کر اپنے ملک کو ایک تحفہ دیا ہے۔ انہوں نے اپنے عزم کا اظہار کرتے ہوئے کہا کہ “میرا جذبہ جوان ہے، انشاءاللہ مزید کامیابیاں حاصل کر کے پاکستان کا نام روشن کرتا رہوں گا۔”
ارشد ندیم نے اپنی کامیابی کو اپنے والدین اور تمام پاکستانیوں کی دعاؤں کا نتیجہ قرار دیا اور کہا کہ اس میں ان کی محنت اور حکومت کا بھرپور تعاون بھی شامل ہے۔ انہوں نے یہ ایشین گولڈ میڈل پاکستان کے شہیدوں کے نام کیا۔
انہوں نے مزید بتایا کہ وہ جیولین تھرو کے فروغ کے لیے نوجوانوں کی رہنمائی کر رہے ہیں تاکہ ملک میں اس کھیل کو مزید پروان چڑھایا جا سکے۔
