نیویارک: نیویارک میں موجود پاکستانی پارلیمانی وفد نے آج سیکرٹری جنرل اقوام متحدہ انتونیو گوتیرس سے ملاقات کی۔ اس ملاقات میں جنوبی ایشیا میں امن و استحکام، بھارت کی حالیہ اشتعال انگیزی اور کشمیر سمیت خطے کے اہم مسائل پر تفصیلی تبادلہ خیال کیا گیا۔
پاکستان پیپلز پارٹی کے چیئرمین بلاول بھٹو زرداری نے اس موقع پر سیکرٹری جنرل کو وزیراعظم پاکستان کا خط پیش کیا۔ بلاول بھٹو نے بھارتی الزامات، حالیہ حملوں اور سندھ طاس معاہدے کی معطلی جیسے اقدامات پر پاکستان کے ٹھوس مؤقف سے اقوام متحدہ کے سیکرٹری جنرل کو آگاہ کیا۔
پاکستانی وفد نے اقوام متحدہ سے مطالبہ کیا کہ وہ پاکستان اور بھارت کے درمیان کشیدگی کے خاتمے، مکالمے کے فروغ اور سندھ طاس معاہدے کی بحالی کے لیے مؤثر کردار ادا کرے۔ وفد نے مسئلہ کشمیر پر جامع مذاکرات کی ضرورت پر بھی زور دیا تاکہ جنوبی ایشیا میں پائیدار امن قائم ہو سکے۔
سیکرٹری جنرل انتونیو گوتیرس نے پاکستان کی امن پسندی کی خواہش کا خیرمقدم کرتے ہوئے اقوام متحدہ کے چارٹر اور بین الاقوامی قراردادوں کے مطابق جنوبی ایشیا میں امن و استحکام کے لیے ہر ممکن تعاون کی یقین دہانی کروائی۔
