اسلام آباد: حجاز مقدس سے پاکستانی حجاج کرام کی وطن واپسی کا سلسلہ جاری ہے۔ اب تک 11 ہزار 418 حجاج کرام وطن واپس پہنچ چکے ہیں۔
اسلام آباد اور لاہور میں 6، 6 پروازیں، کراچی میں 4، ملتان میں 3 اور کوئٹہ میں ایک حج پرواز اترے گی۔ عالمی سطح پر فضائی ٹریفک میں تعطل کے باوجود پاکستان کا پوسٹ حج فلائٹ آپریشن کامیابی سے جاری ہے۔
ترجمان وزارت مذہبی امور نے حجاج کرام سے درخواست کی ہے کہ واپسی کے عمل کو مزید ہموار بنانے کے لیے نظم و ضبط کا خیال رکھیں۔ انہوں نے ہدایت کی کہ حجاج کرام اپنے سامان کا وزن فضائی ٹکٹ پر درج مقررہ حد کے مطابق رکھیں اور رش کے باعث پرواز روانگی سے 6 سے 8 گھنٹے پہلے ایئرپورٹ پر پہنچیں۔
