کوئٹہ:بلوچستان میں متوقع مون سون بارشوں کے پیش نظر پی ڈی ایم اے نے اپنی تیاریاں مکمل کر لی ہیں۔ یہ بات ڈائریکٹر پی ڈی ایم اے فیصل طارق یوسفزئی نے اپنے ایک بیان میں کہی۔
انہوں نے بتایا کہ وزیراعلیٰ بلوچستان میر سرفراز بگٹی کی ہدایات پر تمام ضروری اقدامات پہلے ہی مکمل کر لیے گئے ہیں تاکہ کسی بھی ممکنہ ہنگامی صورتحال سے فوری نمٹا جا سکے۔ فیصل طارق کے مطابق پی ڈی ایم اے کے تمام عملے کی چھٹیاں منسوخ کر دی گئی ہیں تاکہ ہمہ وقت ایمرجنسی رسپانس کو یقینی بنایا جا سکے۔
ڈائریکٹر پی ڈی ایم اے نے بتایا کہ صوبے کے 6ڈویژنل ہیڈکواٹرزمیں تعمیر کا عمل ہوچکا ہے، جبکہ صوبے کے 6 ڈویژنل ہیڈکوارٹرز میں تعمیراتی کام مکمل کر لیا گیا ہے اور وہاں جلد امدادی سامان بھی پہنچا دیا جائے گا۔
انہوں نے کہا کہ یہ ہیڈکوارٹرز اپنے متعلقہ اضلاع میں فوری طور پر امدادی کارروائیاں سرانجام دیں گے اور کسی بھی ناگہانی صورتحال میں بغیر کسی تاخیر کے ریسکیو اینڈ ریلیف آپریشن کی قیادت کر سکیں گے۔
فیصل طارق یوسفزئی نے بتایا کہ پی ڈی ایم اے کا کنٹرول روم 24 گھنٹے مکمل طور پر فعال رکھا جائے گا تاکہ بروقت معلومات اور ردعمل فراہم کیا جا سکے۔
