ڈیرہ اسماعیل خان شہر اور گردونواح میں شدید طوفانی ہواؤں کے ساتھ موسلادھار بارش سے نقصانات، مختلف علاقوں میں چھتیں، دیواریں، درخت، سائن بورڈز اور بجلی کے کھمبے گرنے کے واقعات پیش آئے جن کے نتیجے میں کم از کم 6 افراد جاں بحق اور 47 زخمی ہو گئے۔ترجمان ریسکیو 1122 کے مطابق زخمیوں کو فوری طور پر ڈسٹرکٹ ہیڈکوارٹر ہسپتال کے ٹراما سینٹر منتقل کیا گیا، جہاں انہیں طبی امداد فراہم کی جا رہی ہے۔
متعدد علاقوں میں سڑکوں پر درخت اور بجلی کے پول گرنے سے آمدورفت معطل ہو گئی تھی، تاہم ریسکیو اداروں، ضلعی انتظامیہ اور پولیس کے تعاون سے راستے کھول دیے گئے ہیں۔ طوفان کے باعث گرنے والے سولر پلیٹس، بل بورڈز اور دیگر رکاوٹوں کو بھی ہٹایا جا رہا ہے۔ریسکیو 1122، ضلعی پولیس اور دیگر امدادی ادارے امدادی کارروائیوں میں مصروف ہیں۔
