اسلام آباد:وفاقی وزیر توانائی سرداراویس احمد لغاری نے بہار کے وزیراعلیٰ کی جانب سے ڈاکٹر نصرت پروین کو عوامی طور پر ذلیل کرنے کی شدید مذمت کرتے ہوئے کہاہے کہ کسی عورت کا نقاب زبردستی ہٹانا انسانی وقار اور مذہبی آزادی کی خلاف ورزی ہے۔
بھارت میں مسلمان خاتون کے حجاب کی بے حرمتی پر اپنے ایک بیان میں وفاقی وزیر سردار اویس لغاری نے کہا کہ پاکستان کی جانب سے بہار کے وزیرِ اعلیٰ کے اقدام کی شدید مذمت کرتا ہوں ، ڈاکٹر نصرت پروین کی سرِ عام تضحیک انسانی وقار اور مذہبی آزادی کی خلاف ورزی ہے۔
انہوں نے کہا کہ ایک خاتون کا نقاب زبردستی ہٹانا ناقابلِ قبول اور افسوسناک عمل ہے۔اس واقعے کو مذاق سمجھنا قابل افسوس ہے، بھارت میں مسلم خواتین کے حقوق کو نظرانداز کرنے کا تشویشناک رجحان سامنے آیا ہے۔
اویس لغاری نے کہا کہ ڈاکٹر نصرت پروین کے ساتھ مکمل یکجہتی کا اظہار کرتے ہیں۔بہار کے وزیرِ اعلیٰ غیر مشروط معافی مانگیں ۔مذہبی آزادی کی پامالی عالمی برادری کے لیے لمحۂ فکریہ ہے۔
