اسلام آباد: مئی 2026 پاکستانیوں کے لیے تعطیلات کے حوالے سے خاصا اہم مہینہ ثابت ہو سکتا ہے، جہاں سرکاری چھٹیوں، ویک اینڈز اور عیدالاضحیٰ کی ممکنہ تعطیلات کو ملا کر مجموعی طور پر 14 سے 15 دن تک وقفہ بننے کا امکان ظاہر کیا جا رہا ہے۔
مہینے کا آغاز یومِ مزدور (یکم مئی) سے ہوگا جو جمعہ کے روز آئے گا، جس کے ساتھ ہفتہ اور اتوار کی تعطیلات مل کر تین دن کا مسلسل وقفہ فراہم کریں گی۔
مہینے کے آخر میں عیدالاضحیٰ کے باعث مزید تعطیلات متوقع ہیں۔ اگر 17 مئی کو چاند نظر آ گیا تو عید 27 سے 29 مئی کے درمیان ہو سکتی ہے، جبکہ چاند نظر نہ آنے کی صورت میں عید 28 سے 30 مئی کے درمیان متوقع ہے، جس کے ساتھ ہفتہ وار تعطیلات شامل ہو کر طویل وقفہ بن سکتا ہے۔
مزید برآں اگر حکومت 25 مئی (پیر) کو اضافی چھٹی کا اعلان کرتی ہے تو 23 اور 24 مئی کے ویک اینڈ کے ساتھ مل کر مزید طویل تعطیلات ممکن ہو سکتی ہیں۔
حتمی تاریخوں کا اعلان مرکزی رویت ہلال کمیٹی کے 17 مئی کو ہونے والے اجلاس کے بعد کیا جائے گا۔
