ایکنک کی پولیو کے خاتمے کے لئے ایمرجنسی منصوبے کی منظوری

اسلام آباد:قومی اقتصادی کونسل کی انتظامی کمیٹی(ایکنک) نے پولیو کے خاتمے کیلئے ایک ارب 78کروڑ49 لاکھ30 ہزار ڈالر مالیت کے تیسرے ایمرجنسی منصوبے کی منظوری دیدی ہے۔

نگران وزیر خزانہ شمشاد اختر کی زیر صدارت ہونیوالے قومی اقتصادی کونسل کی انتظامی کمیٹی(ایکنک)کے اجلاس میں منظور کئے گئےمنصوبے میں جی پی ایس آئی پارٹنرز کی جانب سےایک ارب انیس کروڑ 79 لاکھ تیس ہزار ڈالر کی گرانٹ شامل ہےجبکہ پچپن کروڑ بیس لاکھ ڈالر ایشیائی ترقیاتی بینک اور ساڑھے تین کروڑ ڈالر کا اے ایف دی قرضہ شامل ہے۔

منصوبے پر عملدرآمد ڈبلیو ایچ او اور یونیسف کے زریعے ہوگامنصوبے کے تحت ملک میں پولیو کے خاتمے کیلئے ویکسین فراہم کی جائے گی ۔

تفصیلی تبادلہ خیال کے بعد ایکنک نے پی سی ون کا دورانیہ تین سال تک بڑھانے کی بھی منظوری دیدی ہےاور ای اے ڈی کو منصوبے کی فنانسنگ کیلئے حکومت پاکستان کے ایماء پر قرضے کےمعاہدہ کے بھی اختیارات دیدیئے ہیں۔