چیئرمین پی ٹی آئی کی بہن علیمہ خان نے دعویٰ کیا ہے کہ مختلف ذرائع سے چیئرمین پی ٹی آئی کو ملک کو چھوڑنے کا کہا گیا تاہم چیئرمین پی ٹی آئی کا جواب تھا کہ کوئی اپنا گھر بھی چھوڑتا ہے۔ انہوں نے پیر کو بھائی سے ملاقات نہ کروانے کی صورت میں اٹک جیل کے سامنے بیٹھنے کا اعلان کردیا ۔
چیئرمین تحریک انصاف کی بہن علیمہ خان اور عظمہ خان نے میڈیا سے گفتگو کرتے ہوئے کہا کہ آج ہائی کورٹ آ کر پریشانی ہوئی، سنا ہے کہ وکیل کا پیٹ خراب ہو گیا ہے اور وہ بستر پر پڑ گئے ہیں۔ جتنے دن چیئرمین تحریک انصاف جیل میں ہیں ان کے پیٹ خراب ہوتے رہیں گے۔
انہوں نے کہا کہ یہ انصاف نہیں دے پا رہے اس پر قوم سے معافی مانگنی چاہیے ہائی کورٹ اور سپریم کورٹ بیبس ہیں۔ چیئرمین پی ٹی آئی کا تحفظ حکام کی زمہ داری ہے۔ یہ پیٹ خراب کا ڈرامہ ختم ہونے تک ذمہ داری متعلقہ حکام کی ہے۔ پنگ پانگ گیم کھیلی جا رہی ہے۔ اب میں بولی ہوں تو مجھے بھی اب جیل میں ڈال دیں گے ہم سب کو بھی ڈال دیں۔
علیمہ خان نے کہا کہ میرے اوپر 4 اور عظمہ خان پر 6 کیسز بنا دیے گئے ہیں۔ ہم نے بیک پیک کر رکھا ہے ڈال دیں جیل میں۔ لیکن یاد رکھیں چیئرمین پی ٹی آئی نہیں جھکے گا اس کو تو وقت مل گیا ہے قرآن پڑھ رہا ہے۔ عدالت نے یقین دہانی کرائی ہے پیر کو ملاقات کا موقع ملے گا۔ اگر پیر کو اجازت نہ دی گئی تو پیر کو اٹک جیل کے باہر جا کر بیٹھ جائیں گے۔
ان کاکہناتھا کہ چیئرمین پی ٹی آئی ان کے مہمان ہیں وہ جیل میں ان پر بوجھ بنتے جائیں گے۔ انہوں نے الزام عائد کرتے ہوئے کہا کہ شوکت خانم اور نمل کے دفتر میں آ کر ہراساں کرتے ہیں۔
علیمہ خان کا کہنا تھا چیئرمین پی ٹی آئی کو باہر بھیجنے سے متعلق مختلف ذرائع سے رابطے کیے گئے ہیں تاہم چیئرمین پی ٹی آئی نے کہا کہ بھلا کوئی اپنا گھر بھی چھوڑ کر جاتا ہے۔
