میرپور:بنگلادیش نے ٹیسٹ میچ میں افغانستان کو 546 رنز سے شکست دے دی۔
بنگلادیش کے شہر میرپور میں کھیلے گئے واحد ٹیسٹ میچ میں میزبان بنگلادیش کے 662 رنز کے تعاقب میں افغان ٹیم 115 رنز بنا کر آؤٹ ہو گئی۔
بنگلادیش کی ٹیم پہلی اننگز میں 382 بنا کر آؤٹ ہوئی تھی جس میں نجم الحسین 146 اور محمود الحسن 76 رنز بنا کر نمایاں رہے تھے۔
مہمان ٹیم کی جانب سے نجات مسعود نے 5 اور یامین احمدزئی نے 2 وکٹیں حاصل کی تھیں۔
382 رنز کے جواب میں افغان ٹیم اپنی پہلی اننگز میں صرف 146 رنز بناسکی تھی، افسر زازئی 36 اور ناصر جمال 35 رنز بنا کر نمایاں رہے تھے، بنگلادیش کی جانب سے عبادت حسین نے 4، تیج الاسلام، شریف الاسلام اور مہدی حسن نے 2،2 وکٹیں حاصل کیں۔
بنگلا دیش نے اپنی دوسری اننگز میں نجم الحسین اور مومن الحق کی سنچریوں کی بدولت 425 رنز پر اننگز ڈیکلیئر کردی اور مہمان ٹیم کو جیت کے لیے 662 رنز کا ہدف دیا۔
پہاڑ جیسے ہدف کے تعاقب میں افغان ٹیم میچ کے چوتھے دن 115 رنز پر ہی ڈھیر ہو گئی اور رحمت شاہ کے 30 رنز کی اننگز کے علاوہ کوئی افغان بلے باز زیادہ دیر تک وکٹ پر نہ ٹھہر سکا، بنگلادیش کی جانب سے تسکین احمد نے 4 اور شریف الاسلام نے 3 شکار کیے۔
یاد رہے کہ بنگلادیش نے ٹیسٹ کرکٹ کی تاریخ میں رنز کے اعتبار سے یہ تیسری بڑی فتح (546 رنز) حاصل کی ہے۔
آج سے 95 سال قبل 1928 میں انگلینڈ نے آسٹریلیا کو 675 رنز سے ہرا کر سب سے بڑی فتح حاصل کی تھی جس کے بعد آسٹریلیا نے 1934 میں انگلینڈ کو 562 رنز سے ہرا کر ٹیسٹ کرکٹ کی دوسری بڑی کامیابی حاصل کی تھی۔
