پشاور:خیبرپختونخوا میں بارشوں اور سیلاب سے اموات کی تعداد 377 ہوگئی جبکہ 182 افراد زخمی بھی ہوئے ہیں۔
پی ڈی ایم اے نے بارشوں اور فلش فلڈ کے باعث صوبے کے مختلف اضلاع میں اب تک ہونے والے جانی و مالی نقصانات کی رپورٹ جاری کردی۔رپورٹ کے مطابق جاں بحق افراد میں 294 مرد، 50 خواتین اور 33 بچے شامل ہیں، جبکہ 145 مرد،27 خواتین اور 10 بچے زخمی ہوئے ہیں۔
بارشوں اور فلش فلڈ کے باعث مجموعی طور پر 1377 گھر وں کو نقصان پہنچا، جن میں 1022 گھر جزوی طور پر متاثر اور 355 گھر مکمل منہدم ہوئے۔ سیلاب سے زیادہ متاثرہ ضلع بونیر میں 228 افراد جابحق ہوئے۔
یہ حادثات صوبہ کے مختلف اضلاع سوات، بونیر ، باجوڑ، مانسہرہ، شانگلہ , دیر لویر اور بٹگرام، صوابی میں پیش آئے۔ متاثرہ اضلاع کی انتظامیہ کو امدادی سرگرمیاں تیز کرنے اور متاثرین کو فوری معاونت فراہم کرنے کی ہدایت کی گئی۔
پی ڈی ایم اے کا ایمرجنسی آپریشن سنٹر مکمل طور پر فعال ہے۔ عوام کسی بھی نا خوشگوار واقعے کی اطلاع ، موسمی صورتحال سے آگائی اور معلومات کے لیے فری ہیلپ لائن 1700 پر رابطہ کرسکتے ہیں۔
