کوئٹہ:بلوچستان حکومت نے اقلیتی برادری کی سماجی و معاشی ترقی کے لیے “پیپلز مینارٹی کارڈ” کے اجراء کا فیصلہ کیا ہے۔ وزیر اعلیٰ بلوچستان میر سرفراز بگٹی نے اس حوالے سے ایک مشاورتی نشست میں کہا کہ اس پروگرام کے تحت اقلیتوں کو صحت، تعلیم، روزگار اور کاروبار میں خصوصی سہولتیں فراہم کی جائیں گی۔
وزیر اعلیٰ نے بتایا کہ “رواں مالی سال مینارٹی انڈومنٹ فنڈ کے لیے 50 کروڑ روپے مختص کیے گئے ہیں، جبکہ آئندہ مالی سال میں اس پروگرام کا بجٹ ایک ارب روپے تک بڑھایا جائے گا۔” انہوں نے مزید کہا کہ یہ پروگرام اقلیتوں کے حقوق کے تحفظ اور ان کی بہبود کو یقینی بنانے کی حکومتی کوششوں کا حصہ ہے، اور “اقلیتوں کی ترقی سے صوبے کی مجموعی سماجی ہم آہنگی مزید مستحکم ہوگی۔”
پیپلز مینارٹی کارڈ کے ذریعے اقلیتی برادری کے لیے معاونت کے منصوبے شروع کیے جائیں گے، جن میں صحت کی سہولتیں، تعلیمی وظائف، کاروباری قرضے اور روزگار کے مواقع شامل ہیں۔ وزیر اعلیٰ نے یہ بھی کہا کہ “اس پروگرام کے مؤثر نفاذ کے لیے جدید ڈیجیٹل مانیٹرنگ نظام متعارف کرایا جائے گا، تاکہ فنڈز کا شفاف اور مؤثر استعمال یقینی بنایا جا سکے۔”
اس موقع پر پارلیمانی سیکرٹری اقلیتی امور سنجے کمار، چیف سیکرٹری بلوچستان شکیل قادر خان اور پرنسپل سیکرٹری بابر خان سمیت متعلقہ حکام بھی موجود تھے۔ مشاورتی نشست میں اقلیتی رہنماؤں کی مشاورت سے پروگرام کی تفصیلات کو حتمی شکل دی جا رہی ہے، تاکہ اقلیتوں کے حقوق اور ان کی ترقی کے لیے ایک جامع حکمت عملی تیار کی جا سکے۔
“پیپلز مینارٹی کارڈ” بلوچستان میں سماجی مساوات اور بین المذاہب ہم آہنگی کے فروغ کا عملی مظہر ثابت ہوگا، وزیر اعلیٰ نے اس بات پر زور دیا کہ حکومت اقلیتی برادری کی بہبود کے لیے ہر ممکن قدم اٹھائے گی۔
