مظفرآباد :ڈی جی آئی ایس پی آر لیفٹیننٹ جنرل احمد شریف چوہدری، ہلالِ امتیاز (ملٹری)، نے آزاد جموں و کشمیر کے دارالحکومت مظفرآباد کا دورہ کیا۔ اس موقع پر انہوں نے آزاد کشمیر کی سول سوسائٹی کے نمائندوں سے ملاقات کی اور ایک خصوصی نشست میں شرکت کی۔ حاضرین اور ڈی جی آئی ایس پی آر کے درمیان سوال و جواب پر مشتمل ایک جامع اور بامقصد گفتگو بھی ہوئی۔
اس نشست میں شرکاء نے پرزور انداز میں کہا کہ کشمیر پاکستان کی شہ رگ تھا، ہے اور ہمیشہ رہے گا۔ انہوں نے اس عزم کا اظہار کیا کہ پاکستان اور کشمیر کو دنیا کی کوئی طاقت جدا نہیں کر سکتی۔ کشمیری عوام کی پاک فوج سے محبت کا انوکھا انداز بھی اس موقع پر دیکھنے کو ملا، جب ڈی جی آئی ایس پی آر کو کشمیری ثقافت کی نمائندگی کرنے والا روایتی لباس بطور تحفہ پیش کیا گیا۔
حاضرین نے بھارتی جارحیت کا منہ توڑ جواب دینے پر پاک فوج کو زبردست خراجِ تحسین پیش کیا۔ نشست کے اختتام پر شرکاء نے پاکستان اور کشمیر کے جھنڈے لہرا کر نہ صرف یکجہتی کا اظہار کیا بلکہ یہ پیغام بھی دیا کہ کشمیری عوام کل بھی پاکستان کے ساتھ تھے اور آئندہ بھی ہمیشہ پاکستان کے ساتھ رہیں گے۔
