اسلام آباد:الیکشن کمیشن آف پاکستان نے سینیٹر شبلی فراز کی نااہلی کے بعد خالی ہونے والی سینیٹ کی جنرل نشست پر انتخابی شیڈول جاری کر دیا ہے۔ اس شیڈول کے مطابق خیبر پختونخوا اسمبلی کے ارکان 30 اکتوبر کو نئے سینیٹر کا انتخاب کریں گے۔
الیکشن کمیشن کی جانب سے جاری کردہ تفصیلات کے مطابق کاغذاتِ نامزدگی جمع کرانے کی تاریخ 8 اور 9 اکتوبر مقرر کی گئی ہے جبکہ امیدواروں کے ناموں کی ابتدائی فہرست 10 اکتوبر کو شائع کی جائے گی۔ کاغذات نامزدگی کی جانچ پڑتال 13 اکتوبر کو ہوگی۔
امیدواروں کے خلاف اپیل دائر کرنے کی آخری تاریخ 15 اکتوبر مقرر ہے اور ٹریبونل 17 اکتوبر تک اپیلوں پر فیصلے سنائے گا۔ نظرثانی شدہ فہرست 18 اکتوبر کو جاری ہوگی جبکہ امیدوار اپنی نامزدگی 20 اکتوبر تک واپس لے سکیں گے۔
الیکشن کمیشن کے مطابق پولنگ 30 اکتوبر کو خیبر پختونخوا اسمبلی کی عمارت میں ہوگی۔
