وزیراعظم سے سابق کپتان ثناء میر کی ملاقات،ہال آف فیم میں نام شامل ہونے پر مبارکباد دی

اسلام آباد:وزیراعظم محمد شہباز شریف نے کہا ہے کہ حکومت کھیل کے ہر میدان میں میرٹ کی بنیاد پر ٹیلنٹ کو فروغ دینے کے لیے کوشاں ہے ۔کرکٹ سمیت سب کھیلوں میں مرد و خواتین کو یکساں مواقعے اور سہولیات دینا ہماری ترجیحات میں شامل ہے ۔
پاکستان وویمن کرکٹ ٹیم کی سابق کپتان اور ممتاز کرکٹر ثنامیر سے ملاقات کے دوران وزیراعظم نےانٹر نیشنل کرکٹ کونسل کے ہال آف فیم میں ثناء میر کا نام شامل ہونے پر انہیں مبارکباد دی اورپاکستان وویمن کرکٹ ٹیم کی کپتان کے طور پر ان کی کارکردگی کو سراہا ۔
وزیراعظم نے کہا کہ ثنا میر کی قیادت میں پاکستان وویمن کرکٹ ٹیم نے نمایاں کامیابی حاصل کی اور پاکستان کا نام دنیا بھر میں روشن کیا ۔ وزیراعظم نے اس امید کا اظہار کیا کہ ثنا میر اپنے تجربے سے نئے ٹیلنٹ کو کرکٹ کے حوالے سے تربیت فراہم کرنے میں فعال کردار ادا کریں گی ۔
ثنا میر نے وزیراعظم کا شکریہ اداکرتے ہوئےکہا کہ میری پوری کوشش ہے کہ ورلڈ کرکٹ ایسوسی ایشن اور آئی سی سی میں پاکستان کی بھرپور نمائندگی کروں ۔انہوں نے پاکستان میں خواتین کی کرکٹ کو مزید فروغ دینے کے حوالے سے تجاویز بھی دیں ۔