اسلام آباد:سپریم کورٹ میں گلگت بلتستان کی اعلیٰ عدلیہ میں ججز تعیناتی کیس میں عدالت نے لارجر بنچ کی تشکیل کیلئے معاملہ ججز کمیٹی کو بھجوا دیا جبکہ معاونت کیلئے گلگت بلتستان بار کونسل اور سپریم ایپلیٹ بار ایسوسی ایشن کو نوٹس جاری کر دیے، فریقین کو تحریری معروضات بھی جمع کرانے کی بھی ہدایت کردی ۔
سپریم کورٹ میں سابق وزیر اعلیٰ خالد خورشید کی گلگت بلتستان کی عدلیہ میں ججز کی تعیناتی کیخلاف دائر درخواست پر سماعت چیف جسٹس قاضی فائز عیسی کی سربراہی میں تین رکنی بینچ نے کی،،دوران سماعت مقبوضہ کشمیر پر بھارت کے غیرقانونی قبضے کا تذکرہ ہوا جس پر چیف جسٹس نے ریمارکس دیے کہ بھارت نے تو کشمیر کو ہڑپ کر لیا ہے۔
دوران سماعت چیف جسٹس نے سوال پوچھا کہ کیا وفاقی حکومت بن گئی ہے؟ وزیراعظم کون ہیں؟ جس پر گلگت بلتستان حکومت کے وکیل نے جواب دیا کہ حکومت نہیں بنی، لیکن سنا ہے 29 فروری کو اسمبلی اجلاس ہوگا۔
ایڈیشنل اٹارنی جنرل بولے مناسب ہوگا کہ نئی حکومت کی تشکیل کا انتظار کر لیا جائے، وزیراعظم گلگت بلتستان کونسل کے چیئرمین ہوتے ہیں ۔
بعد ازاں عدالت نے معاملہ کمیٹی کو بھجواتے ہوئے سماعت غیرمعینہ مدت کیلئے ملتوی کر دی۔
