اسلام آباد: عالمی مالیاتی ادارے ( آئی ایم ایف) نے ایف بی آر سے 6 امور پر بریفنگ مانگ لی۔آئی ایم ایف حکام کو ایف بی آر کے ذیلی دفاتر کی پیشہ ورانہ کارکردگی سمیت دیگر امور سے آگاہ کیاجائے گا۔
ذرائع کے مطابق ایف بی آر کے حکام آئی ایم ایف کو نئے ٹیکس اقدامات سمیت 6 امور پر بریفنگ دیں گے۔ ایف بی آر کی جانب سے رواں مالی سال ٹیکس کے ہدف کے حصول میں ناکامی،تاجردوست اسکیم کی ناکامی کی وجوہات سے متعلق بتایا جائے گا۔
بریفنگ کے ایجنڈے میں ٹریک اینڈ ٹریس اسکیم کا موثر طریقے سے نفاذ نہ ہونا، صوبوں کی ٹیکس وصولیوں میں سست روی، تنخواہوں، پینشن اور انڈسٹری پر ٹیکس وصولیاں بھی شامل ہیں۔
آئی ایم ایف حکام کو ایف بی آر کے ذیلی دفاتر کی پیشہ ورانہ کارکردگی اور اسمگلنگ کی روک تھام کے لیے کیے جانے والے اقدامات سے بھی آگاہ کیا جائے گا۔
