اسلام آباد: پاکستان میں سرمایہ کاروں کا اعتماد وسیع پیمانے پر بحال ہو گیا ہے اور ملک کی معیشت میں استحکام کے سنہری دور کا آغاز ہو چکا ہے۔ عالمی جریدے بلومبرگ نے پاکستان کی معیشت اور سرمایہ کاروں کے اعتماد کی بحالی کا اعلان کیا ہے۔
بلومبرگ کے مطابق پاکستان کے ڈالر بانڈز کی قدر میں اضافہ جاری رہنے کا امکان ہے اور رواں سال 24.5 فیصد منافع کے ساتھ یہ ایشیا میں سرفہرست ہیں۔ پاکستان پچھلے دو سال کی نسبت اب عالمی قرض مارکیٹ میں واپسی کے لیے تیار ہے، جبکہ ایس اینڈ پی گلوبل اور فچ ریٹنگز نے پاکستان کی کریڈٹ ریٹنگ اپ گریڈ کی ہے، جس سے سرمایہ کاروں کے اعتماد کو تقویت ملی ہے۔
رپورٹ میں کہا گیا ہے کہ پاکستان کا رواں سال یوآن بانڈز اور 2026 میں یورو بانڈ مارکیٹ میں واپسی کا منصوبہ بھی تیار ہے، جس سے عالمی سرمایہ کاروں کا اعتماد مزید مضبوط ہوا ہے۔ عالمی معاشی ماہرین کے مطابق اگلے 6 سے 12 ماہ میں ریٹنگ میں بہتری اور عالمی مارکیٹ تک رسائی پاکستان کی معاشی بحالی کے اہم محرکات ہیں۔
حکومت نے مؤثر معاشی اصلاحات اور مالیاتی انتظام کو سرمایہ کاروں کے اعتماد اور معاشی استحکام کی بنیاد قرار دیا ہے، جبکہ عالمی مالیاتی پلیٹ فارم پر مثبت اقتصادی اشاریے ملک میں معاشی استحکام کا منہ بولتا ثبوت ہیں۔
