نیویارک:نائب وزیرِاعظم و وزیرِخارجہ سینیٹر محمد اسحاق ڈار آج نیویارک میں مصروف دن گزاریں گے۔وہ اقوامِ متحدہ کی سلامتی کونسل کے مشرقِ وسطیٰ بالخصوص مسئلۂ فلسطین سے متعلق بریفنگ میں پاکستان کا قومی بیان پیش کریں گے۔ سلامتی کونسل کا یہ اجلاس برطانوی وزیرِخارجہ کی زیرِصدارت منعقد ہوگا۔
ترجمان دفترخارجہ کے مطابق نائب وزیرِاعظم /وزیرِخارجہ سلامتی کونسل کے اجلاس کے موقع پر متعدد دوطرفہ ملاقاتیں بھی کریں گے۔ وہ مصر، اردن اور انڈونیشیا کے وزرائے خارجہ سے ملاقات کریں گے، جبکہ برطانیہ کے وزیرِخارجہ سے بھی ان کی ملاقات متوقع ہے۔
اقوامِ متحدہ میں ریاستِ فلسطین کے مستقل مبصر سفیر ریاض منصور بھی ان سے ملاقات کریں گے۔
اقوامِ متحدہ میں اپنی مصروفیات کے اختتام پر نائب وزیرِاعظم/وزیرِخارجہ واشنگٹن ڈی سی روانہ ہوں گے تاکہ وزیرِاعظم کے وفد میں شامل ہو سکیں۔
