اسلام آباد دھماکا خوفناک و بزدلانہ جرم ہے، ملالہ یوسفزئی

لندن:نوبیل انعام یافتہ ملالہ یوسفزئی نے اسلام آباد مسجد میں ہونے والے دہشت گرد حملے پر افسوس کا اظہار کرتے ہوئے اس کی شدید الفاظ میں مذمت کی ہے اور اسے خوفناک و بزدلانہ جرم قرار دیا ہے۔
سماجی رابطے کی ویب سائٹ ایکس پر پیغام جاری کرتے ہوئے ملالہ یوسفزئی نے حملے میں شہید ہونے والے افراد کے لواحقین سے دلی ہمدردی کا اظہار کیا ہے۔
انہوں نے اپنے پیغام میں لکھا ہے کہ اسلام آباد میں جمعے کی نماز کے دوران ایک مسجد پر ہونے والے حملے نے مجھے بْری طرح جھنجھوڑ کر رکھ دیا ہے، میں خوفزدہ ہوں، یہ حملہ ہماری مشترکہ انسانیت، ایمان اور اقدار پر حملہ ہے۔
انہوں نے مزید لکھا ہے کہ بے گناہ نمازیوں اور عام شہریوں کو نشانہ بنانا ایک گھناوٴنا اور بزدلانہ فعل ہے۔
ملالہ یوسف زئی نے اس حملے میں شہید ہونے والوں کے لواحقین سے تعزیت کرتے ہوئے یہ بھی لکھا ہے کہ میری دلی ہمدردیاں تمام متاثرین، زخمیوں اور ان کے اہلِ خانہ کے ساتھ ہیں۔