محسن نقوی کی بنوں میں پولیس چوکی پر دہشتگردوں کے حملے کی مذمت،شہید پولیس اہلکاروں کو خراج عقیدت

اسلام آباد: وفاقی وزیرداخلہ محسن نقوی نے بنوں میں سبزی منڈی پولیس چوکی پر فتنہ الخوارج کےدہشتگردوں کے حملے کی مذمت کی ہے۔
ایک بیان میں وزیر داخلہ محسن نقوی نے حملے میں شہید ہونے والے 2 پولیس اہلکاروں کو خراج عقیدت پیش کرتے ہوئے لواحقین سے دلی ہمدردی و اظہار تعزیت کیا اورزخمی پولیس اہلکار کی جلد صحتیابی کیلئے دعا کی ہے۔
انہوں نے کہا کہ ہماری تمام تر ہمدردیاں شہداء کے خاندانوں کے ساتھ ہیں شہید پولیس اہلکاروں کی قربانی کو سلام پیش کرتے ہیں۔
وزیر داخلہ نے واضح کیا کہ خیبرپختونخوا پولیس کے بہادر سپوتوں نے دہشتگردی کے خلاف جنگ میں لازوال قربانیاں دی ہیں، دہشتگردی کے خلاف جنگ میں کے پی کے پولیس ہراول دستے کا کردار ادا کر رہی ہے۔