اسلام آباد:وفاقی وزیر داخلہ محسن نقوی، وزیر مملکت طلال چوہدری اور آئی جی اسلام آباد نے ترلائی کلاں امام بارگاہ/مسجد میں حاضری دی اور نماز ادا کی، نماز اسی امام نے پڑھائی جنہوں نے واقعہ کے دوران امامت کی تھی، نماز میں مقامی افراد کی بڑی تعداد شریک ہوئی۔ ہر آنکھ پرُنم تھی۔
نماز کے بعد غمگین اہلِ علاقہ نے پاکستان زندہ باد کے فلک شگاف نعرے لگائے اور قومی یکجہتی کا بھرپور اظہار کیا۔ وفاقی وزیر داخلہ محسن نقوی نے کہا کہ یہ حملہ کسی ایک طبقے پر نہیں بلکہ پاکستان کی یکجہتی اور انسانیت پر حملہ ہے۔ انہوں نے کہا کہ ہم شہداء کے لواحقین کے ساتھ کھڑے ہیں اور زخمیوں کے لیے بہترین علاج یقینی بنایا جا رہا ہے۔
محسن نقوی نے مزید کہا کہ دہشت گردوں کا مقصد خوف اور تفرقہ پھیلانا ہے، مگر پاکستان کا جواب اتحاد اور ریاستی عملداری ہے۔ انہوں نے کہا کہ مسجد اور دیگر عبادت گاہیں مقدس ہیں اور امن پر حملہ ناقابلِ برداشت ہے۔ عوام سے اپیل کی گئی ہے کہ افواہوں سے بچیں اور ذمہ دار شہری کردار ادا کریں۔
وفاقی وزیر داخلہ نے بتایا کہ سکیورٹی ہائی الرٹ ہے اور ذمہ دار عناصر کو جلد قانون کے کٹہرے میں لایا جائے گا۔ امن و امان برقرار رکھنے کے لیے تمام ضروری اقدامات جاری ہیں۔
