تہران:ایران کے وزیر خارجہ عباس عراقچی نے امریکہ کے ساتھ کسی قسم کے مذاکرات کی تردید کرتے ہوئے کہا ہے کہ فی الحال امریکی حکام کے ساتھ کوئی بات چیت یا مذاکرات کا کوئی منصوبہ موجود نہیں ہے۔ یہ بیان انہوں نے سرکاری ٹی وی کو دیے گئے ایک انٹرویو میں دیا جہاں انہوں نے امریکی صدر ٹرمپ کے اس بیان کی سختی سے تردید کی کہ اگلے ہفتے ایران اور امریکہ کے درمیان مذاکرات ہوں گے۔
عباس عراقچی نے واضح کیا کہ ایران اس وقت یہ جائزہ لے رہا ہے کہ آیا امریکہ کے ساتھ بات چیت کرنا اس کے مفاد میں ہے یا نہیں۔ انہوں نے مزید کہا کہ شوریٰ نگہبان کی منظوری کے بعد آئی اے ای اے (بین الاقوامی ایٹمی توانائی ایجنسی) سے معاہدے کو معطل کرنا ایران پر لازم ہے۔
اس کے علاوہ، ایرانی وزیر خارجہ نے تسلیم کیا کہ ایران کے جوہری مقامات کو نقصان پہنچا ہے، تاہم ایرانی حکام اس نقصان کا تفصیلی جائزہ لے رہے ہیں تاکہ آگے کی حکمت عملی ترتیب دی جا سکے۔
